ഫാൽക്കൺ സെൻസറിലെ തകരാർ മൂലം തടസപ്പെട്ട വിമാനത്താവളങ്ങളിലെ സർവീസുകൾ നേരിട്ട പ്രശ്നം പരിഹരിച്ചെന്ന് വ്യോമയാന മന്ത്രി കെ രാം മോഹൻ നായിഡു പറഞ്ഞു. വിമാനത്താവളങ്ങളുടെ പ്രവർത്തനം ശനിയാഴ്ച പുലർച്ചെ 3 മണിയോടെ പരിഹരിച്ചു. വിമാന സർവ്വീസുകൾ സുഗമമായി നടക്കുന്നെന്നും അദ്ദേഹം പറഞ്ഞു. വിമാന സർവീസുകൾ റദ്ദാക്കിയത് മൂലമുള്ള റീഫണ്ട് വിഷയം സർക്കാർ നിരീക്ഷിച്ചുവരികയാണെന്നും കേന്ദ്രമന്ത്രി പറഞ്ഞു. അതേസമയം ആ​ഗോളതലത്തിലുണ്ടായ സാങ്കേതിക തകരാർ തങ്ങളെ ബാധിച്ചില്ലെന്ന് എയർ ഇന്ത്യ അറിയിച്ചു. ജൂലൈ 19ന് ഒരു സർവീസ് പോലും റദ്ദാക്കേണ്ടി വന്നില്ലെന്നും വിമാനത്താവളങ്ങളിലെ സാങ്കേതിക തകരാറുകൾ മൂലം സർവീസുകൾക്ക് കാലതാമസം മാത്രമാണ് നേരിട്ടതെന്നും എയർലൈൻ വക്താവ് വിശദീകരിച്ചു. അതേസമയം രാജ്യത്തെ വിവിധ എയർപോർട്ടുകളെ ആ​ഗോള സാങ്കേതിക തകരാർ സാരമായി ബാധിച്ചു. കൊൽക്കത്ത വിമാനത്താവളത്തിൽ 25 സർവ്വീസുകൾ റദ്ദാക്കുകയും 70 സർവീസുകൾ വൈകുകയും ചെയ്തു. മുംബൈ, ദില്ലി, ചെന്നൈ, കൊച്ചി വിമാനത്താവളങ്ങളിലെ സർവീസുകളെയും ബാ​ധിച്ചു. അമേരിക്കയിലും, യുകെയിലും, ഓസ്ട്രേലിയയിലുമാണ് ഏറ്റവും കൂടുതൽ വിമാനസർവീസുകൾ റദ്ദാക്കുകയും കാലതാമസം നേരിടുകയും ചെയ്തത്. യുഎഇയിലെ വാർത്തകളും ജോലി ഒഴിവുകളും തത്സമയം അറിയുവാൻ വാട്ട്‌സ്ആപ്പ് ഗ്രൂപ്പൽ അംഗമാകുക https://chat.whatsapp.com/HXPNnXCv5YW23WAD7xwBK9