PRAVASIVARTHA

Storage full; സ്മാർട്ട്ഫോൺ ഉപയോക്താക്കൾ നിത്യേന നേരിടുന്ന പ്രധാന വെല്ലുവിളികളിലൊന്നാണ് വാട്സാപ്പ് വഴി എത്തുന്ന അനാവശ്യ ഫോട്ടോകളും വീഡിയോകളും കാരണം ഫോൺ സ്റ്റോറേജ് അതിവേഗം നിറയുന്നത്. ഗ്രൂപ്പുകളിലും വ്യക്തിഗത ചാറ്റുകളിലുമായി എത്തുന്ന ‘ഗുഡ്മോർണിംഗ്’ സന്ദേശങ്ങൾ മുതൽ വലിയ വീഡിയോ ഫയലുകൾ വരെ ഫോണിന്റെ മെമ്മറി കവരുന്നു. എന്നാൽ വാട്സാപ്പിലെ ‘ഓട്ടോമാറ്റിക് മീഡിയ ഡൗൺലോഡ്’ എന്ന ഫീച്ചർ നിയന്ത്രിക്കുന്നതിലൂടെ ഈ പ്രശ്നത്തിന് ശാശ്വത പരിഹാരം കാണാൻ സാധിക്കും.

നമുക്ക് ആവശ്യമില്ലാത്ത ഫയലുകൾ പോലും ഓട്ടോമാറ്റിക്കായി ഡൗൺലോഡ് ആകുന്നതാണ് സ്റ്റോറേജ് പെട്ടെന്ന് നിറയാൻ കാരണം. താഴെ പറയുന്ന ലളിതമായ മാറ്റങ്ങൾ വരുത്തിയാൽ നിങ്ങൾക്ക് ആവശ്യമുള്ള ഫയലുകൾ മാത്രം തിരഞ്ഞെടുത്ത് ഡൗൺലോഡ് ചെയ്യാനും ഡാറ്റയും സ്റ്റോറേജും ലാഭിക്കാനും സാധിക്കും.

ആൻഡ്രോയിഡ് ഫോൺ

• വാട്സാപ്പ് ഓപ്പൺ ചെയ്ത് വലതുവശത്ത് മുകളിലായി കാണുന്ന മൂന്ന് ഡോട്ടുകളിൽ (Settings) ക്ലിക്ക് ചെയ്യുക.

• തുടർന്ന് ‘Storage and data’ എന്ന ഓപ്ഷൻ തിരഞ്ഞെടുക്കുക.
• ഇവിടെ ‘Media auto-download’ എന്ന വിഭാഗത്തിന് താഴെ മൂന്ന് ഓപ്ഷനുകൾ കാണാം (Mobile data, Wi-Fi, Roaming).
• ഇവ ഓരോന്നും ക്ലിക്ക് ചെയ്ത് അതിൽ ടിക്ക് ചെയ്തിരിക്കുന്ന Photos, Videos, Audio, Documents എന്നിവ അൺചെക്ക് (Uncheck) ചെയ്ത ശേഷം OK നൽകുക.

ഇതോടെ മൊബൈൽ ഡാറ്റയിലോ വൈഫൈയിലോ കണക്റ്റ് ആയാലും അനുവാദമില്ലാതെ മീഡിയ ഫയലുകൾ ഡൗൺലോഡ് ആകില്ല.

ഐഫോൺ

• വാട്സാപ്പ് സെറ്റിങ്സിൽ പ്രവേശിച്ച് ‘Storage and Data’ ക്ലിക്ക് ചെയ്യുക.

• ‘Media Auto-Download’ എന്ന വിഭാഗത്തിൽ Photos, Audio, Videos, Documents എന്നീ ഓപ്ഷനുകൾ ഓരോന്നായി എടുക്കുക.
• ഇവയോരോന്നും ‘Never’ എന്ന് സെലക്ട് ചെയ്യുക.

ഗാലറിയിൽ സേവ് ആകുന്നത് എങ്ങനെ ഒഴിവാക്കാം?

ഓട്ടോമാറ്റിക് ഡൗൺലോഡ് ഓഫ് ചെയ്താലും, നമ്മൾ മാന്വലായി ഡൗൺലോഡ് ചെയ്യുന്ന ഫയലുകൾ ഫോൺ ഗാലറിയിൽ വന്ന് നിറയാറുണ്ട്. ഇത് ഒഴിവാക്കാനും വഴിയുണ്ട്.

• ആൻഡ്രോയിഡിൽ: Settings > Chats എന്നതിലേക്ക് പോയി ‘Media visibility’ എന്ന ഓപ്ഷൻ ഓഫ് ചെയ്യുക.
• ഐഫോണിൽ: Settings > Chats എന്നതിലേക്ക് പോയി ‘Save to Camera Roll’ എന്ന ഓപ്ഷൻ ഓഫ് ചെയ്യുക.

ഈ ക്രമീകരണങ്ങൾ വരുത്തുന്നതോടെ വാട്സാപ്പ് ഫയലുകൾ ചാറ്റുകളിൽ മാത്രം ഒതുങ്ങുകയും ഫോൺ ഗാലറിയിലെ സ്റ്റോറേജ് അനാവശ്യമായി ചിലവാകുന്നത് തടയുകയും ചെയ്യാം.