PRAVASIVARTHA

കുവൈത്ത് സിറ്റി: വാട്സ്ആപ്പ് വഴി വിദ്യാർഥിനിക്ക് അശ്ലീല സന്ദേശങ്ങളും ചിത്രങ്ങളും അയച്ച് ലൈംഗികബന്ധത്തിന് പ്രേരിപ്പിച്ച കേസിൽ സ്വദേശി അധ്യാപകന് ശിക്ഷ വിധിച്ച് കുവൈത്ത് ക്രിമിനൽ കോടതി. അധ്യാപകന് അഞ്ച് വർഷം തടവ് ശിക്ഷയാണ് കോടതി വിധിച്ചത്. സോഷ്യൽ മീഡിയ പ്ലാറ്റ്‌ഫോം വഴി വിദ്യാർഥിനിയെ വേശ്യാവൃത്തിയിലും അശ്ലീല പ്രവർത്തനങ്ങളിലും ഏർപ്പെടാൻ പ്രേരിപ്പിച്ചതിനാണ് ശിക്ഷ. അധ്യാപകനെതിരെ പബ്ലിക് പ്രോസിക്യൂഷൻ കുറ്റം ചുമത്തിയിരുന്നു. വാട്സ്ആപ്പ് വഴി വിദ്യാർഥിക്ക് അയച്ച വ്യക്തമായ അശ്ലീല സന്ദേശങ്ങളും ചിത്രങ്ങളും വീഡിയോ ക്ലിപ്പുകളും ഇയാൾക്കെതിരായ തെളിവുകളായി കോടതിയിൽ ഹാജരാക്കിയിരുന്നു. ഇതിന്റെ അടിസ്ഥാനത്തിലാണ് കോടതി ശിക്ഷ വിധിച്ചത്. കേസെടുത്ത ശേഷം, കുറ്റത്തിന്റെ ഗൗരവം കണക്കിലെടുത്ത് പബ്ലിക് പ്രോസിക്യൂഷൻ അധ്യാപകനെ മുൻകൂർ തടങ്കലിൽ വയ്ക്കാൻ ഉത്തരവിട്ടിരുന്നു. വിദ്യാർഥികളുടെ സംരക്ഷണവും സുരക്ഷയും ക്ഷേമവും ഉറപ്പുവരുത്തേണ്ടവരാണ് അധ്യാപകർ. അധ്യാപിക വിചാരണ നേരിടേണ്ടിവരുമെന്നും ജുഡീഷ്യൽ നടപടികൾ കാലതാമസമില്ലാതെ മുന്നോട്ടുപോകുമെന്നും ഉറപ്പാക്കാനായിരുന്നു ഈ നടപടി. ലൈംഗികാതിക്രമങ്ങൾ ഉൾപ്പെടെയുള്ള ക്രിമിനൽ പ്രവർത്തനങ്ങൾ സുഗമമാക്കുന്നതിൽ സോഷ്യൽ മീഡിയ പ്ലാറ്റ്‌ഫോമുകൾ വഹിക്കുന്ന പ്രധാന പങ്ക് ഈ കേസ് അടിവരയിടുന്നതായി കോടതി നിരീക്ഷിച്ചു. പ്രത്യേകിച്ച് വിദ്യാർഥികളെപ്പോലുള്ള ദുർബലരായ വിഭാഗങ്ങളാണ് ഇതു വഴി എളുപ്പത്തിൽ ഇരകളാക്കപ്പെടുന്നത്. ഇക്കാര്യത്തിലുള്ള കർശനമായ നിയന്ത്രണങ്ങളുടെയും ഓൺലൈൻ സുരക്ഷയെക്കുറിച്ചുള്ള അവബോധത്തിന്റെയും പ്രാധാന്യം കേസ് ഓർമ്മപ്പെടുത്തുന്നെന്നും കോടതി പറഞ്ഞു. അധ്യാപകരിലുള്ള വിശ്വാസം ലംഘിക്കുകയും സംരക്ഷിക്കേണ്ടവർ തന്നെ അവരെ ചൂഷണം ചെയ്യുകയും നിയമവിരുദ്ധ പ്രവർത്തനങ്ങളിൽ ഏർപ്പെടുകയും ചെയ്യുന്നത് ഗുരുതരകുറ്റമാണെന്നും അവർക്കെതിരെ നിയമം കർശനമായ നടപടി സ്വീകരിക്കേണ്ടതുണ്ടെന്നും കോടതി വ്യക്തമാക്കി. ക്രിമിനൽ നടപടികൾ, പ്രത്യേകിച്ച് ചൂഷണവും അധാർമികതയും ഉൾപ്പെടുന്നവ വെച്ചുപൊറുപ്പിക്കില്ലെന്ന ശക്തമായ സന്ദേശമാണ് കുവൈത്ത് അധ്യാപകന്റെ ശിക്ഷാവിധി നൽകുന്നതെന്ന് പ്രോസിക്യൂഷൻ അഭിപ്രായപ്പെട്ടു. ഓൺലൈൻ ഭീഷണികളിൽനിന്ന് വിദ്യാർഥികളെയും യുവാക്കളെയും സംരക്ഷിക്കുന്നതിൽ ജാഗ്രത പുലർത്തേണ്ടതിന്റെ ആവശ്യകതയും ഈ കേസ് ഓർമപ്പെടുത്തുന്നു. പ്രതി ഇതിന് മുൻപും സമാനമായ മറ്റൊരു കേസിൽ ശിക്ഷിക്കപ്പെട്ടതായും അന്വേഷണത്തിൽ വ്യക്തമായതായി പബ്ലിക് പ്രോസിക്യൂട്ടർ കോടതിയെ അറിയിച്ചിരുന്നു. യുഎഇയിലെ വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക
https://chat.whatsapp.com/FEGyCcuaPc2LXexgoWh68A