Kuwait health insurance revenue : കുവൈത്ത് സിറ്റി: കുവൈത്തിൽ വിദേശികൾക്കുള്ള ആരോഗ്യ ഇൻഷുറൻസിൽ നിന്നുള്ള സർക്കാർ വരുമാനം നടപ്പു സാമ്പത്തിക വർഷം 312 ദശലക്ഷം കുവൈത്ത് ദിനാറിലെത്തുമെന്ന് ബജറ്റ് റിപ്പോർട്ട്. കഴിഞ്ഞ സാമ്പത്തിക വർഷത്തെ 120 ദശലക്ഷം ദിനാറിന്റെ കണക്കുമായി താരതമ്യം ചെയ്യുമ്പോൾ 192 ദശലക്ഷം ദിനാറിന്റെ വർധനവാണിത്.

ബജറ്റിലെ ‘സാമൂഹിക സംഭാവനകൾ’ എന്ന വിഭാഗത്തിലാണ് ആരോഗ്യ ഇൻഷുറൻസിൽ നിന്നുള്ള വരുമാനം ഉൾപ്പെടുത്തിയിരിക്കുന്നത്.

വിദേശികൾക്കുള്ള ആരോഗ്യ ഇൻഷുറൻസ് നിയമത്തിന്റെ എക്സിക്യൂട്ടീവ് ചട്ടങ്ങൾ ഉൾക്കൊള്ളുന്ന 306/2025 നമ്പർ മന്ത്രിതല പ്രമേയത്തിന് ആരോഗ്യ മന്ത്രി ഡോ. അഹമ്മദ് അൽ അവാദി അംഗീകാരം നൽകിയിരുന്നു. 2025 ഡിസംബർ 23 മുതൽ പ്രാബല്യത്തിൽ വന്ന ഈ പ്രമേയം ആരോഗ്യ ഇൻഷുറൻസ് സംവിധാനത്തിന്റെ കാര്യക്ഷമത വർധിപ്പിക്കാനും സുസ്ഥിരത ഉറപ്പാക്കാനുമുള്ള നടപടികളുടെ ഭാഗമാണ്.

അതേസമയം, ആരോഗ്യ മന്ത്രാലയത്തിന്റെ അടിസ്ഥാന സൗകര്യങ്ങൾ വികസിപ്പിക്കുന്നതിനായി രണ്ട് പദ്ധതികൾക്കുള്ള ടെൻഡർ നടപടികളും സെൻട്രൽ ഏജൻസി ഫോർ പബ്ലിക് ടെൻഡേഴ്‌സ് (CAPT) പൂർത്തിയാക്കി.

മന്ത്രാലയത്തിന്റെ കേന്ദ്ര മേഖലകളിലെയും വകുപ്പുകളിലെയും കെട്ടിടങ്ങളുടെ പഠനം, രൂപകൽപ്പന, നിർമാണ മേൽനോട്ടം എന്നിവയ്ക്കുള്ളതാണ് ആദ്യ ടെൻഡർ. രണ്ടാമത്തേത് എൻജിനീയറിങ് കാര്യങ്ങളുടെയും പദ്ധതികളുടെയും വിഭാഗത്തിന്റെ വിപുലീകരണവുമായി ബന്ധപ്പെട്ട പഠനം, രൂപകൽപ്പന, നിർമാണ മേൽനോട്ടം എന്നിവയ്ക്കാണ്.

ആദ്യ ടെൻഡറിൽ ആറ് കമ്പനികളും രണ്ടാമത്തെ ടെൻഡറിൽ അഞ്ച് കമ്പനികളും താൽപര്യം അറിയിച്ച് ബിഡുകൾ സമർപ്പിച്ചു.

ജീവനക്കാരുടെയും സന്ദർശകരുടെയും എണ്ണം വർധിക്കുന്ന സാഹചര്യത്തിൽ മന്ത്രാലയത്തിന്റെ സൗകര്യങ്ങൾ വികസിപ്പിക്കുകയും അടിസ്ഥാന സൗകര്യങ്ങൾ മെച്ചപ്പെടുത്തുകയും ചെയ്യുന്നതിന്റെ ഭാഗമായാണ് ഈ പദ്ധതികൾ.