UAE Rain Alert യുഎഇയുടെ വിവിധ ഭാഗങ്ങളിൽ വെള്ളിയാഴ്ചയും മഴ തുടരുന്നു. കിഴക്കൻ മേഖലകളിലും അൽ ഐനിലും ശക്തമായ മഴ ലഭിച്ചതായി റിപ്പോർട്ടുകൾ വ്യക്തമാക്കുന്നു. ഇടിമിന്നൽ, ആലിപ്പഴ വർഷം, ശക്തമായ കാറ്റ് എന്നിവയ്ക്ക് സാധ്യതയുള്ളതിനാൽ ദേശീയ കാലാവസ്ഥാ കേന്ദ്രം (NCM) ജാഗ്രതാ നിർദേശം പുറപ്പെടുവിച്ചു.

ഷാർജയിലെ കൽബയിലുള്ള വാദി അൽ ഹേലോ സ്ട്രീറ്റിലും അൽ ഐനിലെ മലാഖിത് മേഖലയിലും ശക്തമായ മഴ ലഭിച്ചു. രാജ്യത്തിന്റെ വിവിധ ഭാഗങ്ങളിൽ രൂപപ്പെടുന്ന മഴമേഘങ്ങൾ മൂലം കാലാവസ്ഥയിൽ മാറ്റങ്ങൾ തുടരുകയാണ്.

രാത്രി 9 മണിവരെ കാലാവസ്ഥാ മുന്നറിയിപ്പ്

വെള്ളിയാഴ്ച ഉച്ചയ്ക്ക് രണ്ടിന് നിലവിൽ വന്ന കാലാവസ്ഥാ മുന്നറിയിപ്പ് രാത്രി 9 മണിവരെ തുടരുമെന്നാണ് NCM അറിയിച്ചിരിക്കുന്നത്. വൈകിട്ട് 4.05ന് പുറത്തിറക്കിയ പുതുക്കിയ മുന്നറിയിപ്പിൽ ഖോർഫക്കാൻ, ഫുജൈറ എന്നിവിടങ്ങളിൽ നിന്ന് അൽ ഐൻ വരെയുള്ള കിഴക്കൻ മേഖലകൾ ഉൾപ്പെട്ടിട്ടുണ്ട്.

അബുദാബിയുടെ തെക്കുപടിഞ്ഞാറൻ ഭാഗത്തുള്ള ചില ഉൾനാടൻ പ്രദേശങ്ങളിലും ജാഗ്രതാ നിർദേശമുണ്ട്. ഫുജൈറയുടെ ചില ഭാഗങ്ങളിലും അൽ ഐനിന്റെ തെക്കുകിഴക്കൻ മേഖലയിലും കൂടുതൽ ജാഗ്രത ആവശ്യമായ സാഹചര്യമാണുള്ളത്.

കിഴക്കൻ മേഖലയിലെ മലനിരകളിലും മധ്യമേഖലയിലും ഇടിമിന്നലോടുകൂടിയ മഴയ്ക്ക് സാധ്യതയുണ്ട്. മഴമേഘങ്ങൾ ദുബായ്–അൽ ഐൻ റോഡിലേക്കും വ്യാപിച്ചേക്കാം. ചിലയിടങ്ങളിൽ ആലിപ്പഴ വർഷത്തിനും ശക്തമായ കാറ്റിനും സാധ്യതയുണ്ടെന്ന് അധികൃതർ മുന്നറിയിപ്പ് നൽകി.

ശക്തമായ കാറ്റ് പൊടിപടലങ്ങൾ ഉയർത്തുന്നതിനാൽ തുറന്ന റോഡുകളിലും മരുഭൂമി മേഖലകളിലും കാഴ്ചപരിധി കുറയാൻ സാധ്യതയുണ്ട്.

വാഹനയാത്രക്കാർ ശ്രദ്ധിക്കണം

മഴ തുടരുന്ന സാഹചര്യത്തിൽ അത്യാവശ്യമല്ലെങ്കിൽ വാഹനയാത്ര ഒഴിവാക്കണമെന്ന് ദേശീയ കാലാവസ്ഥാ കേന്ദ്രം നിർദേശിച്ചു. യാത്ര അനിവാര്യമാണെങ്കിൽ വേഗം കുറച്ച് ജാഗ്രതയോടെ വാഹനമോടിക്കണം. കാഴ്ചപരിധി കുറയുന്ന സമയങ്ങളിൽ ലോ ബീം ഹെഡ്‌ലൈറ്റുകൾ ഉപയോഗിക്കണമെന്നും നിർദേശമുണ്ട്.

കാലാവസ്ഥാ വിവരങ്ങൾ ഔദ്യോഗിക ചാനലുകൾ വഴി മാത്രം പരിശോധിക്കണമെന്നും സ്ഥിരീകരിക്കാത്ത വാർത്തകളും അഭ്യൂഹങ്ങളും പ്രചരിപ്പിക്കരുതെന്നും അധികൃതർ അറിയിച്ചു.

താഴ്ന്ന പ്രദേശങ്ങളിലും വാദികളിലും പോകരുത്

മഴയും കാലാവസ്ഥാ വ്യതിയാനങ്ങളും തുടരാൻ സാധ്യതയുള്ളതിനാൽ ഡ്രൈവർമാർ ജാഗ്രത പാലിക്കണമെന്ന് അബുദാബി പൊലീസ് മുന്നറിയിപ്പ് നൽകി. യാത്രയ്ക്കു മുമ്പ് കാലാവസ്ഥ പരിശോധിക്കുകയും വാഹനങ്ങൾ തമ്മിൽ സുരക്ഷിത അകലം പാലിക്കുകയും വേണം.

ഒഴുകുന്ന വാദികളിലേക്കോ മഴവെള്ളം കെട്ടിക്കിടക്കുന്ന പ്രദേശങ്ങളിലേക്കോ അടുക്കരുതെന്നും പൊലീസ് നിർദേശിച്ചു. വാഹനമോടിക്കുമ്പോൾ മൊബൈൽ ഫോൺ ഉപയോഗിച്ച് ചിത്രങ്ങളോ വിഡിയോകളോ പകർത്തുന്നതും ഒഴിവാക്കണം. റോഡിലെ വേഗപരിധി പാലിക്കുന്നതിനൊപ്പം നിലവിലെ കാലാവസ്ഥയ്ക്ക് അനുസരിച്ച് വേഗം ക്രമീകരിക്കണമെന്നും അധികൃതർ ആവശ്യപ്പെട്ടു.