Marine Moorings Installed to Protect Coral Reefs കുവൈത്ത് സിറ്റി: കുവൈത്തിലെ കുബ്ബാർ ദ്വീപിനു ചുറ്റും പവിഴപ്പുറ്റുകളെ സംരക്ഷിക്കുന്നതിനായി 35 മറൈൻ മൂറിങ്ങുകൾ സ്ഥാപിച്ച് കുവൈത്ത് ഡൈവ് ടീം. ബോട്ടുകളും യാച്ചുകളും നങ്കൂരമിടുമ്പോൾ പവിഴപ്പുറ്റുകൾക്ക് സംഭവിക്കുന്ന നാശം തടയുകയാണ് പദ്ധതിയുടെ പ്രധാന ലക്ഷ്യം. കുവൈത്തിലെ പരിസ്ഥിതി സന്നദ്ധ സംഘടനയായ എൻവയൺമെന്റൽ വൊളന്ററി ഫൗണ്ടേഷനു കീഴിലാണ് ഡൈവ് ടീം പ്രവർത്തിക്കുന്നത്.

കുവൈത്തിലെ തെക്കൻ ദ്വീപുകൾക്കും പ്രധാന പവിഴപ്പുറ്റ് മേഖലകൾക്കും ചുറ്റും മറൈൻ മൂറിങ്ങുകൾ സ്ഥാപിക്കുകയും പരിപാലിക്കുകയും ചെയ്യുന്ന പദ്ധതിയുടെ ഭാഗമായാണ് നടപടി. സമുദ്രപരിസ്ഥിതിയും അതിലെ ജൈവവൈവിധ്യവും സംരക്ഷിക്കുന്നതിനുള്ള പ്രധാന പ്രതിരോധ പ്രവർത്തനമാണിതെന്ന് കുവൈത്ത് ഡൈവ് ടീമിലെ മറൈൻ ഓപ്പറേഷൻസ് മേധാവി വലീദ് അൽ ഷട്ടി പറഞ്ഞു.

നങ്കൂരമിടുമ്പോൾ പവിഴപ്പുറ്റുകൾക്ക് നാശം സംഭവിക്കുന്നത് തടയും

ബോട്ടുകളും യാച്ചുകളും പരമ്പരാഗത നങ്കൂരങ്ങൾ ഉപയോഗിച്ച് പവിഴപ്പുറ്റുകൾ നിറഞ്ഞ കടൽമേഖലകളിൽ നിർത്തുമ്പോൾ പവിഴപ്പുറ്റുകൾ തകരാനും നശിക്കാനും സാധ്യതയുണ്ട്. ഇതിന് പകരമായി സുരക്ഷിതമായി ബോട്ടുകൾ കെട്ടിയിടുന്നതിനുള്ള സംവിധാനമാണ് മറൈൻ മൂറിങ്ങുകൾ ഒരുക്കുന്നത്.

കടലിൽ ഒഴുകിയെത്തുന്ന ഉപേക്ഷിക്കപ്പെട്ട മത്സ്യബന്ധന വലകളും മറ്റ് മാലിന്യങ്ങളും പവിഴപ്പുറ്റുകളിൽ കുടുങ്ങി നാശമുണ്ടാക്കുന്നത് തടയാനും ഈ സംവിധാനം സഹായിക്കും. കൂടാതെ, ആഴം കുറഞ്ഞ കടൽമേഖലകളുടെ സുരക്ഷിത അതിരുകൾ തിരിച്ചറിയാൻ സന്ദർശകർക്ക് കഴിയുന്നതിനാൽ ബോട്ടുകൾ കടലിനടിയിലെ പാറകളിലോ മറ്റ് തടസ്സങ്ങളിലോ ഇടിച്ചുകയറാനുള്ള സാധ്യതയും കുറയും.

1997ൽ ആരംഭിച്ച പദ്ധതി; ആകെ 130 മൂറിങ്ങുകൾ

1997ൽ ആരംഭിച്ച മറൈൻ മൂറിങ് പദ്ധതി വർഷങ്ങളായി വികസിപ്പിച്ചുവരികയാണെന്ന് അൽ ഷട്ടി വ്യക്തമാക്കി. കടുത്ത കാലാവസ്ഥയിലും സുരക്ഷയും ദീർഘകാല ഉപയോഗക്ഷമതയും ഉറപ്പാക്കുന്ന രീതിയിലാണ് ഇവ രൂപകൽപ്പന ചെയ്തിരിക്കുന്നത്.

പവിഴപ്പുറ്റുകൾ കൂടുതലുള്ള വിവിധ സമുദ്ര മേഖലകളിലായി നിലവിൽ ആകെ 130 മറൈൻ മൂറിങ്ങുകളുണ്ടെന്ന് അദ്ദേഹം അറിയിച്ചു. ഇവയുടെ പ്രവർത്തനക്ഷമത ഉറപ്പാക്കാൻ വർഷം മുഴുവൻ നിരീക്ഷണവും പരിപാലനവും ആവശ്യമാണ്.

മൂറിങ് സംവിധാനങ്ങൾ സ്ഥാപിക്കുന്നതിലും പരിപാലിക്കുന്നതിലുമുള്ള ടീമിന്റെ അനുഭവം ഡോക്യുമെന്ററികൾ, ചിത്രങ്ങൾ, വിവരങ്ങൾ എന്നിവയിലൂടെ അന്താരാഷ്ട്ര തലത്തിലും പങ്കുവെച്ചിട്ടുണ്ട്. സമുദ്രത്തിലെ സുരക്ഷിതമായ ബോട്ടിങ് രീതികൾ പ്രോത്സാഹിപ്പിക്കുന്നതിലും പവിഴപ്പുറ്റുകൾ സംരക്ഷിക്കുന്നതിലും പദ്ധതി പ്രധാന പങ്കുവഹിക്കുന്നതായി അധികൃതർ ചൂണ്ടിക്കാട്ടി.

കുബ്ബാർ ദ്വീപിന്റെ പ്രകൃതിസമ്പത്ത് സംരക്ഷിക്കാൻ നടപടി

കുവൈത്തിലെ അൽ സൂർ തീരത്തുനിന്ന് ഏകദേശം 30 കിലോമീറ്റർ അകലെയാണ് കുബ്ബാർ ദ്വീപ് സ്ഥിതി ചെയ്യുന്നത്. ഏകദേശം 1,40,000 ചതുരശ്ര മീറ്റർ വിസ്തൃതിയുള്ള ദ്വീപിന് 370 മീറ്റർ നീളവും 300 മീറ്റർ വീതിയുമുണ്ട്. തെളിഞ്ഞ വെള്ളവും വെളുത്ത മണൽത്തീരങ്ങളും ചുറ്റുമുള്ള പവിഴപ്പുറ്റുകളുമാണ് ദ്വീപിന്റെ പ്രത്യേകതകൾ.

രണ്ട് മുതൽ 20 മീറ്റർ വരെ ആഴമുള്ള കടൽമേഖലകളിൽ പവിഴപ്പുറ്റുകൾ കാണപ്പെടുന്നു. അപൂർവ ദേശാടന പക്ഷികളുടെ ആവാസകേന്ദ്രം കൂടിയാണ് ഈ ദ്വീപ്. അതിനാൽ ദ്വീപിന്റെ പ്രകൃതിസമ്പത്തും വന്യജീവികളും സംരക്ഷിക്കേണ്ടത് അത്യാവശ്യമാണെന്ന് അധികൃതർ വ്യക്തമാക്കി.

പവിഴപ്പുറ്റുകളിൽ കുടുങ്ങിയ മത്സ്യബന്ധന വലകൾ നീക്കം ചെയ്യൽ, മുങ്ങിയ ബോട്ടുകളും യാച്ചുകളും വീണ്ടെടുക്കൽ, കടൽമാലിന്യങ്ങൾ നീക്കം ചെയ്യൽ തുടങ്ങിയ പ്രവർത്തനങ്ങളും ഡൈവ് ടീം ഇവിടെ നടത്തിയിട്ടുണ്ട്.

സമുദ്രപരിസ്ഥിതി സംരക്ഷണ നിയമങ്ങൾ നടപ്പാക്കുന്നതിലും നാവിഗേഷൻ സുരക്ഷ ഉറപ്പാക്കുന്നതിലും കോസ്റ്റ് ഗാർഡ് ജനറൽ അഡ്മിനിസ്ട്രേഷൻ, പരിസ്ഥിതി പബ്ലിക് അതോറിറ്റി, പബ്ലിക് അതോറിറ്റി ഫോർ അഗ്രികൾച്ചർ അഫയേഴ്‌സ് ആൻഡ് ഫിഷ് റിസോഴ്‌സസ് എന്നിവയുടെ പ്രവർത്തനങ്ങളെ അൽ ഷട്ടി അഭിനന്ദിച്ചു. കടലിലെത്തുന്നവരും ബോട്ടുകളുടെയും യാച്ചുകളുടെയും ഉടമകളും പരിസ്ഥിതി സംരക്ഷണ നിർദേശങ്ങൾ പാലിക്കണമെന്നും അദ്ദേഹം അഭ്യർഥിച്ചു.

പവിഴപ്പുറ്റുകൾക്ക് മുകളിലൂടെ നേരിട്ട് നങ്കൂരമിടുന്നതിന് പകരം നിശ്ചയിച്ചിട്ടുള്ള മറൈൻ മൂറിങ്ങുകൾ ഉപയോഗിക്കുന്നത് സമുദ്രത്തിലെ ജൈവവൈവിധ്യം സംരക്ഷിക്കുന്നതിനുള്ള പ്രധാന നടപടിയാണെന്ന് അധികൃതർ ഓർമിപ്പിച്ചു.