Qatar Accelerates Development Projects ദോഹ: ഖത്തറിൽ വൈകിയ റോഡ്, അടിസ്ഥാന സൗകര്യ വികസന പദ്ധതികൾ വേഗത്തിലാക്കാൻ പുതിയ കരാറുകാർക്ക് പദ്ധതികൾ പുനർനൽകി. പൊതുമരാമത്ത് അതോറിറ്റിയായ അഷ്ഗാൽ ആണ് ശേഷിക്കുന്ന എട്ട് പദ്ധതികൾ പുതിയ കരാറുകാർക്ക് കൈമാറിയതായി അറിയിച്ചത്. പദ്ധതികളുടെ പ്രവൃത്തികൾ പുനരാരംഭിക്കുന്നതിനുള്ള നടപടികളുടെ ഭാഗമായാണ് നടപടി. 2025 ഏപ്രിൽ മുതൽ 13 പദ്ധതികളുടെ പ്രവൃത്തികൾ ഇതിനകം പുനരാരംഭിച്ചിട്ടുണ്ട്.

അഷ്ഗാൽ പ്രസിഡന്റ് എൻജിനീയർ മുഹമ്മദ് ബിൻ അബ്ദുൽ അസീസ് അൽ മീറിന്റെ നേതൃത്വത്തിൽ രാജ്യത്തെ വിവിധ റോഡ്, അടിസ്ഥാന സൗകര്യ വികസന പദ്ധതികളിൽ ഫീൽഡ് പരിശോധന നടത്തി. പദ്ധതികളുടെ പുരോഗതി, പൂർത്തിയാക്കാനുള്ള പ്രവൃത്തികൾ, നിലവിലെ നിർമാണ സ്ഥിതി എന്നിവ അദ്ദേഹം വിലയിരുത്തി.

വൈകിയ പദ്ധതികളിലെ ശേഷിക്കുന്ന പ്രവൃത്തികൾ പുതിയ കരാറുകാർക്ക് പുനർനൽകിയതിലൂടെ നിർമാണം വേഗത്തിലാക്കാനും കാര്യക്ഷമത മെച്ചപ്പെടുത്താനുമാണ് ലക്ഷ്യമിടുന്നതെന്ന് അഷ്ഗാൽ വ്യക്തമാക്കി. താമസക്കാരുടെയും റോഡ് ഉപയോക്താക്കളുടെയും യാത്ര സുഗമമാക്കുന്നതിനും ഗതാഗതപ്രവാഹം മെച്ചപ്പെടുത്തുന്നതിനും ശേഷിക്കുന്ന പ്രവൃത്തികൾ വേഗത്തിൽ പൂർത്തിയാക്കുന്നതിലാണ് ഇപ്പോഴത്തെ പ്രധാന ശ്രദ്ധ. അംഗീകരിച്ച സമയക്രമം പാലിക്കുന്നുണ്ടെന്ന് ഉറപ്പാക്കാൻ തുടർച്ചയായ ഫീൽഡ് നിരീക്ഷണവും നടത്തും.

പദ്ധതി വൈകിയതിന്റെ ആഘാതം കൂടുതലുള്ള മേഖലകളിൽ പ്രവൃത്തികൾ കൂടുതൽ ശക്തമാക്കാനും ജനങ്ങൾക്ക് നേരിട്ട് പ്രയോജനം ലഭിക്കുന്ന റോഡുകളും പ്രധാന ഭാഗങ്ങളും വേഗത്തിൽ തുറന്നുകൊടുക്കാനും അഷ്ഗാൽ നിർദേശം നൽകിയിട്ടുണ്ട്. വീടുകളിലേക്കും പൊതുസൗകര്യങ്ങളിലേക്കും സുരക്ഷിതമായ പ്രവേശനം ഉറപ്പാക്കുന്നതിനൊപ്പം റോഡ്, അടിസ്ഥാന സൗകര്യ ശൃംഖലകൾ ഗുണനിലവാരവും സുരക്ഷാ മാനദണ്ഡങ്ങളും പാലിച്ച് പൂർത്തിയാക്കുന്നതിനും പ്രാധാന്യം നൽകും.

അഷ്ഗാൽ പ്രോജക്ട്സ് അഫയേഴ്സ് ഡയറക്ടർ എൻജിനീയർ ഖാലിദ് അൽ ഖയരീൻ പറയുന്നതനുസരിച്ച്, പുനർനൽകിയ പദ്ധതികളുടെ പ്രവൃത്തികൾ വേഗത്തിൽ പുരോഗമിക്കുകയാണ്. ആദ്യ പാക്കേജ് 2027ലെ മൂന്നാം പാദത്തിൽ പൂർത്തിയാക്കാനാണ് ലക്ഷ്യമിടുന്നത്. ശേഷിക്കുന്ന ചില പദ്ധതികളും പുതിയ കരാറുകാർക്ക് കൈമാറിയിട്ടുണ്ട്. അംഗീകരിച്ച പദ്ധതികളും സമയക്രമവും അനുസരിച്ച് അവ പൂർത്തിയാക്കാനാണ് നീക്കം.

2025 ഏപ്രിൽ മുതൽ പ്രവൃത്തി പുനരാരംഭിച്ച 13 പദ്ധതികൾ വടക്കൻ, തെക്കൻ, പടിഞ്ഞാറൻ മേഖലകളിലും ദോഹ നഗരത്തിലുമായി 11,500-ലധികം പ്ലോട്ടുകൾക്ക് സേവനം നൽകുന്നവയാണ്.

8 പദ്ധതികൾ

പുതിയ കരാറുകാർക്ക് പുനർനൽകിയ എട്ട് പദ്ധതികളിൽ അൽ ഖറൈതിയാത്ത്, ഇസ്ഗാവ (പാക്കേജ് 4), അൽ ഖീസ നോർത്ത് ആൻഡ് ഈസ്റ്റ്–റൗദത് അൽ ഹമാമ (പാക്കേജ് 2), അൽ മിഷാഫ് വെസ്റ്റ് (പാക്കേജ് 9), അൽ മിറാദ്–മുഐതർ സൗത്ത്‌വെസ്റ്റ് (പാക്കേജ് 6), വെസ്റ്റ് ഉം സലാൽ അലി, ഉം ഉബൈരിയ വില്ലേജ്, സൗത്ത് ഉം അൽ അമദ്, നോർത്ത് ബു ഫസീല (പാക്കേജ് 1), അൽ ഷഹാനിയ (പാക്കേജ് 1) എന്നിവിടങ്ങളിലെ റോഡ്, അടിസ്ഥാന സൗകര്യ വികസന പദ്ധതികൾ ഉൾപ്പെടുന്നു.

ഈ എട്ട് പദ്ധതികൾ ചേർന്ന് ഏകദേശം 6,360 താമസ പ്ലോട്ടുകൾക്ക് സേവനം നൽകും.

ഇതിന് പുറമെ അൽ ഷഹാനിയയെ ദോഹ നോർത്ത് മലിനജല ശുദ്ധീകരണ പ്ലാന്റുമായി ബന്ധിപ്പിക്കുന്ന പ്രധാന മലിനജല ശൃംഖലയുടെ നിർമാണവും ഡുഖാൻ റോഡിനും ദോഹ നോർത്ത് മലിനജല ശുദ്ധീകരണ പ്ലാന്റിനുമിടയിലെ ഓർബിറ്റൽ ഹൈവേയിൽ ട്രീറ്റഡ് സീവേജ് എഫ്ലുവന്റ് (TSE) പൈപ്പ് ലൈൻ നിർമാണവും പദ്ധതികളുടെ ഭാഗമാണ്.

റോഡ് വികസനത്തോടൊപ്പം മലിനജല, മഴവെള്ള ഡ്രെയിനേജ്, ശുദ്ധീകരിച്ച മലിനജല ശൃംഖലകൾ എന്നിവയും വികസിപ്പിക്കും. താമസ മേഖലകളിലെ യാത്ര കൂടുതൽ സുഗമമാക്കുക, പ്രധാന റോഡുകളുമായും സൗകര്യങ്ങളുമായും മികച്ച ബന്ധം ഒരുക്കുക, റോഡ് സുരക്ഷ വർധിപ്പിക്കുക എന്നിവയാണ് പദ്ധതികളുടെ പ്രധാന ലക്ഷ്യങ്ങൾ.