യുഎഇയിലെ ഇന്ത്യൻ നിവാസികൾക്ക് ഇനി കുറഞ്ഞ ടിക്കറ്റ് നിരക്കിൽ വിമാനയാത്ര ചെയ്യാം. ബജറ്റ് എയർലൈനായ ഇൻഡിഗോ അടുത്ത മാസം ഇന്ത്യയിലെ മൂന്ന് നഗരങ്ങളിലേക്ക് കൂടി പ്രവർത്തനം വ്യാപിപ്പിക്കുന്നു. അബുദാബിയിൽ നിന്നും ഇന്ത്യൻ നഗരങ്ങളായ മംഗളൂരു, കോയമ്പത്തൂർ, തിരുച്ചിറപ്പള്ളി എന്നിവിടങ്ങളിൽ ഓഗസ്റ്റ് മുതൽ കുറഞ്ഞ നിരക്കിലുള്ള സർവീസുകൾ ഇൻഡിഗോ നടത്തും. ഓഗസ്റ്റ് 9 മുതൽ ദിവസവും അബുദാബി- മംഗളൂരു സർവീസ് ഉണ്ടായിരിക്കും. ഓഗസ്റ്റ് 11 മുതൽ തിരുച്ചിറപ്പള്ളി-അബുദാബി വിമാനസർവീസ് ആഴ്ചയിൽ നാല് തവണയുണ്ടാകും. ഓഗസ്റ്റ് 10 മുതൽ ആഴ്ചയിൽ മൂന്ന് തവണയാണ് കോയമ്പത്തൂർ- അബുദാബി സർവീസ് ഉണ്ടാവുക. അബുദാബിയിൽ നിന്ന് മംഗളൂരുവിലേക്കും കോയമ്പത്തൂരിലേക്കുമുള്ള വൺവേ വിമാന നിരക്ക് യഥാക്രമം 353 ദിർഹം, 330 ദിർഹം എന്നിങ്ങനെയായിരിക്കും. യുഎഇ യാത്രക്കാർക്ക് മടക്കയാത്രാ നിരക്ക് 843 ദിർഹം വരെ കുറയും. “ഈ ഫ്ലൈറ്റുകളുടെ കൂട്ടിച്ചേർക്കലിനൊപ്പം, ഇൻഡിഗോ ഇപ്പോൾ ഇന്ത്യയിലെ 13 നഗരങ്ങളിൽ നിന്ന് അബുദാബിയിലേക്ക് ആഴ്ചയിൽ 89 നോൺ-സ്റ്റോപ്പ് ഫ്ലൈറ്റുകൾ നടത്തുന്നു,” ഇൻഡിഗോയുടെ ആഗോള സെയിൽസ് മേധാവി വിനയ് മൽഹോത്ര പറഞ്ഞു. എയർലൈൻ തങ്ങളുടെ ഉപഭോക്താക്കൾക്ക് താങ്ങാനാവുന്ന നിരക്കിൽ യാത്രാ അനുഭവം നൽകുമെന്നും അദ്ദേഹം കൂട്ടിച്ചേർത്തു. ഇൻഡിഗോ നേരത്തെ ഓഗസ്റ്റ് 1 മുതൽ ആഴ്ചയിൽ ആറ് തവണ ബെംഗളൂരുവിനും അബുദാബിക്കും ഇടയിൽ നേരിട്ടുള്ള ഫ്ലൈറ്റുകൾ പ്രഖ്യാപിച്ചിരുന്നു. ജനുവരിയിൽ, ബജറ്റ് എയർലൈനായ ഇൻഡിഗോ അതിൻ്റെ എല്ലാ ആഭ്യന്തര, അന്തർദ്ദേശീയ വിമാനങ്ങളിലും ഇന്ധന ചാർജുകൾ എടുത്തുകളയുന്നതായും പ്രഖ്യാപിച്ചിരുന്നു. യുഎഇയിലെ വാർത്തകളും ജോലി ഒഴിവുകളും തത്സമയം അറിയുവാൻ വാട്ട്‌സ്ആപ്പ് ഗ്രൂപ്പൽ അംഗമാകുക https://chat.whatsapp.com/HXPNnXCv5YW23WAD7xwBK9
