ദോഹ: ഇലക്ട്രോണിക് മാലിന്യങ്ങൾ (ഇ-വേസ്റ്റ്) ശരിയായ രീതിയിൽ കൈകാര്യം ചെയ്യുന്നതിനും പുനരുപയോഗം പ്രോത്സാഹിപ്പിക്കുന്നതിനുമായി വീടുകളിൽനിന്ന് ഇ-മാലിന്യം ശേഖരിക്കുന്നതിനുള്ള സേവനം ലഭ്യമാക്കിയതായി ഖത്തർ പരിസ്ഥിതി കാലാവസ്ഥാ വ്യതിയാന മന്ത്രാലയം അറിയിച്ചു. ഉപയോഗശൂന്യമായ ഇലക്ട്രോണിക് ഉപകരണങ്ങൾ സുരക്ഷിതമായി സംസ്കരിക്കാനും പരിസ്ഥിതി സംരക്ഷണത്തിൽ പൊതുജനങ്ങളുടെ പങ്കാളിത്തം ഉറപ്പാക്കാനുമാണ് ഈ സേവനം ലക്ഷ്യമിടുന്നത്.

ഒക്ടോബർ 14ന് ആചരിക്കുന്ന അന്താരാഷ്ട്ര ഇ-മാലിന്യ ദിനത്തോടനുബന്ധിച്ച് പുറത്തിറക്കിയ പ്രസ്താവനയിലാണ് മന്ത്രാലയം ഇക്കാര്യം വ്യക്തമാക്കിയത്. ഇലക്ട്രോണിക് മാലിന്യങ്ങൾ ശരിയായ രീതിയിൽ കൈകാര്യം ചെയ്യേണ്ടതിന്റെ പ്രാധാന്യത്തെക്കുറിച്ച് ജനങ്ങളിൽ അവബോധം വളർത്തുകയും ഉപേക്ഷിക്കപ്പെടുന്ന ഇലക്ട്രിക്കൽ, ഇലക്ട്രോണിക് ഉപകരണങ്ങളുടെ പുനരുപയോഗവും പുനഃചംക്രമണവും പ്രോത്സാഹിപ്പിക്കുകയുമാണ് ദിനാചരണത്തിന്റെ പ്രധാന ലക്ഷ്യം.

വിലപ്പെട്ട വിഭവങ്ങൾ വീണ്ടെടുക്കാം

ഇലക്ട്രോണിക് മാലിന്യങ്ങൾ പരിസ്ഥിതിക്ക് വെല്ലുവിളിയാകുമ്പോഴും അവയിൽനിന്ന് വിലപ്പെട്ട വസ്തുക്കൾ വീണ്ടെടുത്ത് വ്യാവസായിക ആവശ്യങ്ങൾക്കായി വീണ്ടും ഉപയോഗിക്കാൻ സാധിക്കുമെന്ന് മന്ത്രാലയം ചൂണ്ടിക്കാട്ടി. ഇത്തരത്തിലുള്ള പുനഃചംക്രമണം പ്രകൃതിവിഭവങ്ങളുടെ ഉപയോഗം കുറയ്ക്കാനും വിഭവങ്ങൾ കാര്യക്ഷമമായി വിനിയോഗിക്കാനും സഹായിക്കും.

സാങ്കേതികവിദ്യയുടെ അതിവേഗ വളർച്ചയോടെ മൊബൈൽ ഫോണുകൾ, കമ്പ്യൂട്ടറുകൾ, മറ്റ് ഇലക്ട്രോണിക് ഉപകരണങ്ങൾ എന്നിവയുടെ ഉപയോഗം വർധിച്ചുവരികയാണ്. ഇതോടൊപ്പം ഉപയോഗശൂന്യമാകുന്ന ഉപകരണങ്ങളുടെ അളവും കൂടുന്ന സാഹചര്യത്തിൽ അവ ഉത്തരവാദിത്തത്തോടെ കൈകാര്യം ചെയ്യേണ്ടത് അനിവാര്യമാണെന്ന് മന്ത്രാലയം വ്യക്തമാക്കി.

ഇലക്ട്രോണിക് മാലിന്യങ്ങൾ അലക്ഷ്യമായി ഉപേക്ഷിക്കുന്നത് പരിസ്ഥിതിക്ക് ദോഷകരമായ പ്രത്യാഘാതങ്ങൾ സൃഷ്ടിക്കാം. അതിനാൽ ഇത്തരം ഉപകരണങ്ങൾ സാധാരണ മാലിന്യങ്ങൾക്കൊപ്പം തള്ളാതെ അനുയോജ്യമായ ശേഖരണ-സംസ്കരണ സംവിധാനങ്ങളിലേക്ക് കൈമാറണമെന്ന് മന്ത്രാലയം നിർദേശിച്ചു.

വീടുകളിൽനിന്ന് ഇ-മാലിന്യം ശേഖരിക്കും

പരിസ്ഥിതി സംരക്ഷണത്തിൽ ജനങ്ങൾക്ക് കൂടുതൽ എളുപ്പത്തിൽ പങ്കാളികളാകുന്നതിനായി വീടുകളിൽനിന്ന് ഇ-മാലിന്യം ശേഖരിക്കാൻ അപേക്ഷിക്കാവുന്ന സേവനം ലഭ്യമാക്കിയതായി മന്ത്രാലയം അറിയിച്ചു. ഉപയോഗിക്കാത്ത ഇലക്ട്രോണിക് ഉപകരണങ്ങൾ ശരിയായ രീതിയിൽ കൈമാറാനും അവ അനുയോജ്യമായ ശേഖരണ-സംസ്കരണ കേന്ദ്രങ്ങളിലേക്ക് എത്തിക്കാനും ഈ സംവിധാനം സഹായിക്കും.

ഇ-മാലിന്യത്തിന്റെ അളവ് കുറയ്ക്കുന്നതിന് ഉപകരണങ്ങളുടെ ആയുസ്സ് പരമാവധി നീട്ടാനും മന്ത്രാലയം ആഹ്വാനം ചെയ്തു. അറ്റകുറ്റപ്പണികളിലൂടെ വീണ്ടും ഉപയോഗിക്കാവുന്ന ഉപകരണങ്ങൾ നന്നാക്കി ഉപയോഗിക്കുക, പ്രവർത്തനക്ഷമമായ ഉപകരണങ്ങൾ മറ്റുള്ളവർക്ക് കൈമാറുകയോ സംഭാവന ചെയ്യുകയോ ചെയ്യുക, കേടായ ഉപകരണങ്ങൾ ബന്ധപ്പെട്ട അധികൃതർക്ക് കൈമാറുക തുടങ്ങിയ നടപടികൾ സ്വീകരിക്കണം.

ഇലക്ട്രോണിക് ഉപകരണങ്ങളും ബാറ്ററികളും സാധാരണ ഗാർഹിക മാലിന്യങ്ങൾക്കൊപ്പം ഉപേക്ഷിക്കരുതെന്നും മന്ത്രാലയം പ്രത്യേകം ഓർമിപ്പിച്ചു.