Kuwait dog ownership rules : കുവൈത്ത് സിറ്റി: നായകളെ വളർത്തുന്നതും പരിപാലിക്കുന്നതുമായി ബന്ധപ്പെട്ട മാർഗനിർദ്ദേശങ്ങൾ ഗവൺമെന്റ് കമ്മ്യൂണിക്കേഷൻ സെന്റർ പുറത്തിറക്കി. നായ ഉടമകൾ ലൈസൻസ് നേടണമെന്നും നായയുടെ സീരിയൽ നമ്പർ രേഖപ്പെടുത്തിയ ലോഹ ടാഗ് ഘടിപ്പിക്കണമെന്നും അൽ സെയാസ ദിനപത്രം റിപ്പോർട്ട് ചെയ്തു.

നായകൾക്ക് ആവശ്യമായ പരിശോധനകളും റാബിസ് വാക്സിനേഷനും ഉറപ്പാക്കാൻ ഉടമകൾ അവയെ വെറ്ററിനറി കേന്ദ്രങ്ങളിൽ എത്തിക്കണം. കൂടാതെ, വർഷംതോറും ബൂസ്റ്റർ വാക്സിൻ നൽകേണ്ടതിന്റെ പ്രാധാന്യവും അധികൃതർ ചൂണ്ടിക്കാട്ടി.

പൊതുസ്ഥലങ്ങളിൽ നായകളെ നടത്തുമ്പോൾ ശ്രദ്ധിക്കണം

പൊതുസ്ഥലങ്ങളിലും റോഡുകളിലും നായകളെ നടത്തുമ്പോൾ മൂക്കിൽ മസിൽ (muzzle) ഘടിപ്പിക്കുകയും ലെഷ് ഉപയോഗിച്ച് നിയന്ത്രിക്കുകയും വേണം. നായകളെ സുരക്ഷിതമായി കൈകാര്യം ചെയ്യുന്നതിനും പൊതുജനങ്ങളുടെ സുരക്ഷ ഉറപ്പാക്കുന്നതിനുമാണ് ഈ നിർദ്ദേശങ്ങൾ.

റാബിസ് സംശയമുണ്ടെങ്കിൽ അറിയിക്കണം

നായയ്ക്ക് റാബിസ് ബാധിച്ചതായി കണ്ടെത്തുകയോ രോഗബാധയുണ്ടെന്ന് സംശയിക്കുകയോ ചെയ്താൽ ഉടമകൾ ഉടൻ വെറ്ററിനറി കേന്ദ്രത്തെ അറിയിക്കണം. റാബിസ് ബാധിച്ചതോ രോഗബാധ സംശയിക്കുന്നതോ ആയ മൃഗങ്ങളുടെ ശവശരീരങ്ങൾ സംസ്കരിക്കുകയോ കുഴിച്ചിടുകയോ ചെയ്യരുതെന്നും അധികൃതർ മുന്നറിയിപ്പ് നൽകി.

നിയമലംഘനത്തിന് തടവും പിഴയും

മാർഗനിർദ്ദേശങ്ങൾ ലംഘിക്കുന്നവർക്ക് ഒരു മാസം വരെ തടവോ 30 കുവൈത്ത് ദിനാർ വരെ പിഴയോ ലഭിക്കാം. അല്ലെങ്കിൽ രണ്ട് ശിക്ഷകളും ഒരുമിച്ച് ലഭിക്കാമെന്നും ഗവൺമെന്റ് കമ്മ്യൂണിക്കേഷൻ സെന്റർ അറിയിച്ചു.