Measures to Strengthen the Fisheries Sector ദോഹ: മത്സ്യത്തൊഴിലാളികളുടെ ആവശ്യങ്ങൾ പരിഹരിക്കുന്നതിനും രാജ്യത്തെ മത്സ്യബന്ധന മേഖലയുടെ വികസനം ഉറപ്പാക്കുന്നതിനുമായി നടപടികൾ ശക്തമാക്കി ഖത്തർ. പ്രാദേശിക ഉൽപ്പാദനം വർധിപ്പിക്കുകയും ഭക്ഷ്യസുരക്ഷ ഉറപ്പാക്കുകയും ചെയ്യുന്നതിന്റെ ഭാഗമായാണ് പുതിയ നീക്കങ്ങൾ.
കൃഷി, ഭക്ഷ്യസുരക്ഷാ വിഭാഗം അസിസ്റ്റന്റ് അണ്ടർസെക്രട്ടറി യൂസഫ് ഖാലിദ് അൽ ഖുലൈഫിയുടെ അധ്യക്ഷതയിൽ മത്സ്യത്തൊഴിലാളികളുമായും മത്സ്യബന്ധന ബോട്ടുകളുടെയും കപ്പലുകളുടെയും ഉടമകളുമായും കൂടിയാലോചനാ യോഗം ചേർന്നു. മത്സ്യബന്ധന മേഖല നേരിടുന്ന വെല്ലുവിളികൾ ചർച്ച ചെയ്യുന്നതിനും മേഖലയെ കൂടുതൽ വികസിപ്പിക്കുന്നതിനുള്ള മാർഗങ്ങൾ കണ്ടെത്തുന്നതിനുമായിരുന്നു യോഗം.
ഫിഷറീസ് വകുപ്പിന് കീഴിലുള്ള അക്വാട്ടിക് റിസർച്ച് സെന്ററിൽ നടന്ന യോഗത്തിൽ വകുപ്പ് ഡയറക്ടറും മറ്റ് ഉദ്യോഗസ്ഥരും പങ്കെടുത്തു. മത്സ്യത്തൊഴിലാളികൾ നേരിടുന്ന പ്രശ്നങ്ങൾ നേരിട്ട് മനസ്സിലാക്കി പ്രായോഗിക പരിഹാരങ്ങൾ കണ്ടെത്തേണ്ടതിന്റെ പ്രാധാന്യം അൽ ഖുലൈഫി യോഗത്തിൽ വ്യക്തമാക്കി.
പ്രാദേശിക ഉൽപ്പാദനത്തെ പിന്തുണയ്ക്കുന്നതിനും രാജ്യത്തിന്റെ ഭക്ഷ്യസുരക്ഷ ശക്തിപ്പെടുത്തുന്നതിനും മത്സ്യബന്ധന മേഖല നിർണായകമാണെന്നും അദ്ദേഹം ചൂണ്ടിക്കാട്ടി.
യോഗത്തിൽ മത്സ്യത്തൊഴിലാളികൾക്ക് അവരുടെ ആശങ്കകളും തൊഴിൽമേഖലയിലെ പ്രശ്നങ്ങളും ഉദ്യോഗസ്ഥരുമായി തുറന്നുപറയാൻ അവസരം ലഭിച്ചു. ചർച്ചകളുടെ അടിസ്ഥാനത്തിൽ നിരവധി ശുപാർശകൾ രേഖപ്പെടുത്തി.
ഈ ശുപാർശകൾ ജീവജലവിഭവ സമിതിയുമായി സഹകരിച്ച് വിശദമായി പരിശോധിക്കും. മത്സ്യത്തൊഴിലാളികളുടെ ആവശ്യങ്ങൾ പരിഗണിക്കുന്നതിനൊപ്പം മത്സ്യബന്ധന മേഖലയുടെ തുടർച്ചയായ വികസനത്തിനും അനുയോജ്യമായ പരിഹാരങ്ങൾ കണ്ടെത്തുകയാണ് ലക്ഷ്യം. പ്രാദേശിക ഭക്ഷ്യോൽപ്പാദനം വർധിപ്പിക്കുകയും മത്സ്യവിഭവങ്ങളുടെ മേഖലയിൽ സുസ്ഥിരമായ വളർച്ച ഉറപ്പാക്കുകയും ചെയ്യാനുള്ള ഖത്തറിന്റെ ശ്രമങ്ങളുടെ ഭാഗമായാണ് ഈ നടപടികൾ.
