This is the main cause of road accidents in Qatar ദോഹ: ഖത്തറിൽ വാഹനാപകടങ്ങൾക്ക് കാരണമാകുന്ന പ്രധാന ഘടകങ്ങളെക്കുറിച്ച് മുന്നറിയിപ്പ് നൽകി ആഭ്യന്തര മന്ത്രാലയം. സുരക്ഷിതമായ ഡ്രൈവിങ് ശീലങ്ങൾ പാലിക്കണമെന്നും ഗതാഗതനിയമങ്ങൾ കൃത്യമായി അനുസരിക്കണമെന്നും മന്ത്രാലയം വാഹനയാത്രക്കാരോട് നിർദേശിച്ചു.

അശ്രദ്ധമായ ലെയ്ൻ മാറ്റം, ഡ്രൈവിങിനിടെ ശ്രദ്ധക്കുറവ്, വാഹനങ്ങൾ തമ്മിൽ സുരക്ഷിതമായ അകലം പാലിക്കാതിരിക്കൽ എന്നിവയാണ് അപകടങ്ങൾക്ക് കാരണമാകുന്ന പ്രധാന ഘടകങ്ങളായി മന്ത്രാലയം ചൂണ്ടിക്കാട്ടിയത്.

ലെയ്ൻ മാറ്റുമ്പോൾ ജാഗ്രത വേണം

റോഡിലെ സാഹചര്യം കൃത്യമായി പരിശോധിക്കാതെ പെട്ടെന്ന് ലെയ്ൻ മാറുന്നതും വാഹനങ്ങൾക്കിടയിലൂടെ അപകടകരമായ രീതിയിൽ നീങ്ങുന്നതും കൂട്ടിയിടികൾക്ക് കാരണമാകാം. ലെയ്ൻ മാറ്റുന്നതിന് മുമ്പ് റോഡ് സുരക്ഷിതമാണെന്ന് ഉറപ്പാക്കേണ്ടത് അത്യാവശ്യമാണ്.

ഡ്രൈവിങിനിടെ ശ്രദ്ധക്കുറവ് അപകടകരം

വാഹനമോടിക്കുമ്പോൾ ശ്രദ്ധ നഷ്ടപ്പെടുന്നത് നിയന്ത്രണം തെറ്റുന്നതിനും അപകടങ്ങൾ സംഭവിക്കുന്നതിനും ഇടയാക്കുമെന്ന് മന്ത്രാലയം മുന്നറിയിപ്പ് നൽകി. ഡ്രൈവർമാർ റോഡിലെ സാഹചര്യങ്ങളിൽ പൂർണ ശ്രദ്ധ പുലർത്തണം.

വാഹനങ്ങൾ തമ്മിൽ സുരക്ഷിത അകലം പാലിക്കണം

മുന്നിലുള്ള വാഹനത്തോട് വളരെ അടുത്ത് വാഹനം ഓടിക്കുന്നതും അപകടസാധ്യത വർധിപ്പിക്കുന്നു. ഗതാഗത സാഹചര്യങ്ങളിൽ പെട്ടെന്നുണ്ടാകുന്ന മാറ്റങ്ങൾക്കനുസരിച്ച് വാഹനം നിർത്താൻ മതിയായ അകലം ആവശ്യമാണ്. സുരക്ഷിതമായ അകലം പാലിക്കാത്തത് കൂട്ടിയിടികൾക്ക് കാരണമാകാമെന്നും മന്ത്രാലയം വ്യക്തമാക്കി.

റോഡിലേക്ക് പ്രവേശിക്കുമ്പോൾ ശ്രദ്ധിക്കുക

റോഡിലേക്ക് പ്രവേശിക്കുമ്പോഴോ തിരിയുമ്പോഴോ മറ്റ് വാഹനങ്ങളുടെ സാന്നിധ്യം പരിശോധിക്കാതെ മുന്നോട്ടുപോകുന്നത് ഡ്രൈവർമാർക്കും മറ്റ് റോഡ് ഉപയോക്താക്കൾക്കും അപകടമുണ്ടാക്കാം. അതിനാൽ റോഡിലെ സാഹചര്യം ഉറപ്പാക്കിയശേഷം മാത്രമേ മുന്നോട്ടുപോകാവൂ.

ഗതാഗതനിയമങ്ങളും സുരക്ഷാ നിർദേശങ്ങളും പാലിക്കണമെന്ന് ആഭ്യന്തര മന്ത്രാലയം വീണ്ടും ആവശ്യപ്പെട്ടു. ഉത്തരവാദിത്തത്തോടെയുള്ള ഡ്രൈവിങ് റോഡിലുള്ള എല്ലാവരുടെയും സുരക്ഷ ഉറപ്പാക്കാനും അപകടങ്ങൾ കുറയ്ക്കാനും സഹായിക്കുമെന്നും മന്ത്രാലയം വ്യക്തമാക്കി.