Afseh App ദുബായ്: യുഎഇയിലേക്കുള്ള യാത്രയില്‍ 60,000 ദിര്‍ഹം മൂല്യമുള്ള പണം, സ്വര്‍ണങ്ങള്‍, ജ്വല്ലറി, ഡയമണ്ടുകള്‍, മറ്റ് മൂല്യമേറിയ വസ്തുക്കള്‍ കൊണ്ടുപോകുന്നുണ്ടെങ്കില്‍ ഒരു ആപ്പ് വഴി യുഎഇ സര്‍ക്കാരിനെ അറിയിക്കണം. അഫ്സെഹ് എന്ന ആപ്പിലൂടെയാണ് സര്‍ക്കാരിനെ അറിയിക്കേണ്ടത്. യുഎഇയിലേക്കോ പുറത്തേക്കോ യാത്ര ചെയ്യുന്ന എല്ലാ യാത്രക്കാരും 60,000 ദിർഹത്തിൽ കൂടുതലോ അല്ലെങ്കിൽ മറ്റേതെങ്കിലും കറൻസിയിൽ തുല്യമായ തുക, സാമ്പത്തിക ആസ്തികൾ, വിലയേറിയ ലോഹങ്ങൾ അല്ലെങ്കിൽ ഡയമണ്ടുകള്‍ എന്നിവയെ കുറിച്ച് കസ്റ്റംസ് ഉദ്യോഗസ്ഥരോട് അറിയിക്കേണ്ടത് നിർബന്ധമാണ്. വിമാനത്താവളങ്ങൾ, തുറമുഖങ്ങൾ, കര അതിർത്തികൾ എന്നിവയിലൂടെ രാജ്യത്തേക്ക് പ്രവേശിക്കുകയും പുറത്തുകടക്കുകയും ചെയ്യുന്ന എല്ലാ താമസക്കാർക്കും സന്ദർശകർക്കും ഇത് ബാധകമാണ്. 18 വയസിന് മുകളിലുള്ള ഓരോ കുടുംബാംഗത്തിനും 60,000 ദിർഹത്തിൽ കൂടാത്ത തുകയോ അതിന് തുല്യമായ വിദേശ കറൻസിയോ കസ്റ്റംസ് ഉദ്യോഗസ്ഥരോട് വെളിപ്പെടുത്താതെ കൊണ്ടുപോകാൻ അവകാശമുണ്ട്. യുഎഇയിലെ വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക https://chat.whatsapp.com/KpmqRbHQBz88D2o8Opt0Oe ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്, കസ്റ്റംസ് ആൻഡ് പോർട്ട്സ് സെക്യൂരിറ്റി (ഐസിപി) ആണ് അഫ്സെഹ് എന്ന ആപ്പ് വികസിപ്പിച്ചെടുത്തത്. താമസക്കാരും പൗരന്മാരും ആറ് ഘട്ടങ്ങളിലൂടെ വിശദാംശങ്ങൾ സമർപ്പിക്കുകയും പണത്തിന്‍റെയും വിലപിടിപ്പുള്ള വസ്തുക്കളുടെയും തുകയോ മൂല്യമോ അറിയിക്കുകയും വേണം. ഈ വിവരങ്ങൾ എഡിറ്റ് ചെയ്യാൻ കഴിയുന്നതിനാൽ, രാജ്യത്തേക്ക് വരുമ്പോഴോ പുറത്തേക്ക് വരുമ്പോഴോ അത് കൂടുകയോ കുറയുകയോ ചെയ്താൽ പിന്നീട് മൂല്യം അപ്‌ഡേറ്റ് ചെയ്യാനുള്ള ഓപ്ഷൻ ആളുകൾക്ക് ഉണ്ട്.