Saudi Arabia Flight Disruptions : റിയാദ്: സൗദി അറേബ്യയിൽ വിമാന സർവീസുകൾ തടസ്സപ്പെടുന്ന സാഹചര്യത്തിൽ ഇന്ത്യൻ പൗരന്മാർക്ക് പുതിയ ജാഗ്രതാ നിർദേശം നൽകി ഇന്ത്യൻ എംബസി. പ്രാദേശിക അധികൃതരുടെ നിർദേശങ്ങൾ കർശനമായി പാലിക്കണമെന്നും സുരക്ഷയിൽ പ്രത്യേക ശ്രദ്ധ പുലർത്തണമെന്നും ഒക്ടോബർ 16ന് പുറത്തിറക്കിയ അറിയിപ്പിൽ എംബസി ആവശ്യപ്പെട്ടു.

വ്യോമാക്രമണം ഉണ്ടായാൽ വീടിനുള്ളിൽ തന്നെ കഴിയണം. നിലവിലെ സംഭവങ്ങളുമായി ബന്ധപ്പെട്ട വിവരങ്ങൾ, ചിത്രങ്ങൾ, വീഡിയോകൾ എന്നിവ ചിത്രീകരിക്കുകയോ പ്രസിദ്ധീകരിക്കുകയോ മറ്റുള്ളവരുമായി പങ്കുവെക്കുകയോ ചെയ്യരുതെന്നും എംബസി നിർദേശിച്ചു.

റിയാദ് വിമാനത്താവളം അടച്ചിട്ടു; ആറ് ഇന്ത്യക്കാർ ചികിത്സയിൽ

ഒക്ടോബർ 10ന് റിയാദ് വിമാനത്താവളത്തിലുണ്ടായ ആക്രമണത്തിൽ പരിക്കേറ്റ ആറ് ഇന്ത്യൻ പൗരന്മാർ ഇപ്പോഴും ചികിത്സയിലാണെന്ന് എംബസി അറിയിച്ചു.

ഇവരിൽ രണ്ടുപേർ തീവ്രപരിചരണ വിഭാഗത്തിലും ഒരാൾ ഹൈ ഡിപെൻഡൻസി യൂണിറ്റിലും ചികിത്സയിലാണ്. മറ്റ് മൂന്ന് പേർ സാധാരണ വാർഡിലാണ് കഴിയുന്നത്.

റിയാദ് അന്താരാഷ്ട്ര വിമാനത്താവളത്തിൽ വിമാന സർവീസുകൾ ഇപ്പോഴും പുനരാരംഭിച്ചിട്ടില്ല. ദമ്മാം, ജിദ്ദ, മദീന വിമാനത്താവളങ്ങൾ പ്രവർത്തിക്കുന്നുണ്ടെങ്കിലും ചില സർവീസുകളിൽ തടസ്സങ്ങൾ തുടരുകയാണ്.

ഇന്ത്യൻ വിമാനക്കമ്പനികൾ സർവീസുകൾ നീട്ടി റദ്ദാക്കി

സൗദിയിലേക്കും അവിടെനിന്നുമുള്ള വിമാന സർവീസുകൾ റദ്ദാക്കുന്ന കാലാവധി വിവിധ ഇന്ത്യൻ വിമാനക്കമ്പനികൾ നീട്ടിയിട്ടുണ്ട്.

• എയർ ഇന്ത്യ, എയർ ഇന്ത്യ എക്സ്പ്രസ്: സൗദിയിലേക്കും തിരിച്ചുമുള്ള എല്ലാ റൂട്ടുകളിലെയും സർവീസുകൾ ഒക്ടോബർ 20 വരെ റദ്ദാക്കി.
• ആകാശ എയർ: റിയാദിലേക്കും തിരിച്ചുമുള്ള സർവീസുകൾ ഒക്ടോബർ 24 വരെയും ജിദ്ദയിലേക്കും തിരിച്ചുമുള്ള സർവീസുകൾ ഒക്ടോബർ 21 വരെയും റദ്ദാക്കി.
• ഇൻഡിഗോ: എല്ലാ റൂട്ടുകളിലെയും സർവീസുകൾ ഒക്ടോബർ 24 വരെ റദ്ദാക്കി.

മറ്റ് വിമാനക്കമ്പനികളുടെ സർവീസുകൾ

സൗദി അറേബ്യയുടെ ദേശീയ വിമാനക്കമ്പനിയായ സൗദിയ ദമ്മാം, ജിദ്ദ, മദീന എന്നിവിടങ്ങളിൽനിന്ന് ഇന്ത്യൻ നഗരങ്ങളിലേക്കുള്ള ഷെഡ്യൂൾ സർവീസുകൾ തുടരുന്നുണ്ട്.

ഫ്ലൈനാസ് ദമ്മാം–ലഖ്‌നൗ റൂട്ടിൽ സർവീസ് നടത്തുന്നുണ്ട്. ഫ്ലൈഡീൽ ഒക്ടോബർ 17, 18 തീയതികളിൽ ദമ്മാം–മുംബൈ സർവീസുകളും പ്രഖ്യാപിച്ചിട്ടുണ്ട്.

എന്നാൽ യാത്രയ്ക്ക് മുമ്പ് വിമാനത്തിന്റെ നിലവിലെ സ്ഥിതിയും സമയക്രമവും ബന്ധപ്പെട്ട വിമാനക്കമ്പനികളിലൂടെ ഉറപ്പാക്കണമെന്ന് യാത്രക്കാർ ശ്രദ്ധിക്കണം.

അടിയന്തരമായി മടങ്ങേണ്ടവർക്ക് നിർദേശം

അടിയന്തരമായി സൗദി അറേബ്യ വിടേണ്ട ഇന്ത്യൻ പൗരന്മാർക്ക് ബഹ്‌റൈൻ, കുവൈത്ത്, ഖത്തർ എന്നിവിടങ്ങൾ വഴി യാത്ര ചെയ്യുന്നത് പരിഗണിക്കാമെന്ന് എംബസി അറിയിച്ചു. എന്നാൽ അതത് രാജ്യങ്ങളിലേക്ക് പ്രവേശിക്കുന്നതിനാവശ്യമായ വിസകളും മറ്റ് അനുമതികളും ഉണ്ടായിരിക്കണം.

ഉംറ ഉൾപ്പെടെയുള്ള ആവശ്യങ്ങൾക്കായി സൗദിയിലേക്ക് യാത്ര ചെയ്യാൻ പദ്ധതിയിടുന്നവരും നിലവിലെ വിമാനത്താവള നിയന്ത്രണങ്ങളും സർവീസ് റദ്ദാക്കാനുള്ള സാധ്യതയും കണക്കിലെടുക്കണം. വിമാനങ്ങൾ റദ്ദാക്കപ്പെടുന്നത് യാത്ര നീളുന്നതിനും സൗദിയിൽ കൂടുതൽ ദിവസം തുടരേണ്ടിവരുന്നതിനും കാരണമാകാം.

പ്രാദേശിക അധികൃതരുടെ നിർദേശങ്ങൾ പാലിക്കണമെന്നും യാത്രാ വിവരങ്ങൾ സ്ഥിരീകരിച്ചശേഷം മാത്രം വിമാനത്താവളത്തിലേക്ക് പുറപ്പെടണമെന്നും ഇന്ത്യൻ എംബസി ഓർമിപ്പിച്ചു.